《復活節黃山2天遊》
作者：Wong Yik Fung Patrick
細細個聽爸爸媽媽話以前成日坐火車番大陸旅行，樣樣都要平，一直都好想體驗一下佢地既青蔥歲月。今年復活清明連續幾日長假，一於揹起背包出發。而講到要又平又有靚風景，梗係去行山親親大自然。今次就揀個最出名既黃山！
黃山位於安徽省南部，最高的蓮花峰有海拔1840米。「五嶽歸來不看山，黃山歸來不看嶽。」由古至今都有不少詩人文人係黃山之巔吟詩作對，驚嘆大自然既鬼斧神工。
出發去黃山之前一定要搞清楚黃山市區入面既地方名。黃山市係包含好多小鎮地方，一般我地話去行黃山，係指黃山風景區，飛機同火車都唔可以直接到既。無論黃山既機場定火車站，都係屯溪區入面。而家愈來愈多航空公司有開香港直飛屯溪，或者可以去深圳坐內陸機，價錢平少少，來回HKD1600-2000；想慳錢體驗艱苦團坐火車，可以上網（ctrip, 芒果網⋯）或者去中旅社預訂火車飛。建議早d買飛，買臥鋪休息，CNY325一程，事關深圳去黃山要坐19小時。我就比較遲買火車飛，要坐硬座⋯坐到腰都直埋。
搭咁耐，就算坐係度都要訓一訓。
火車去到屯溪係朝早7:30，時間夠鬆動，先去街邊檔買d手抓餅同肉飽做早點。買既時候車站附近已經有好多工作人員問你係咪去行山叫你買車飛，又叫你幫襯買行山杖、雨褸、地圖等等。
假日既話要等半個鐘至一個鐘先上到車。
屯溪距離風景區都仲有一段路程，首先要搭車去湯口鎮的換乘中心，再係換乘中心搭風景區入面的專營巴士先到達風景區既山腳。你可以選擇去前山從慈光閣起步，或者從後山雲谷寺起始。至於由前山定後山起步好d呢，就取決於你會唔會係山上入住，同埋入住邊間賓館喇。
我今次就選擇左從前山上後山下。係山腳望上去已經好興奮，d雲好靚！
其實黃山既路比想像中安全，全部都係已開發既石路同石級，不過當然有好多好高既石級令你爬到氣喘。
浴路都有好多指示牌，又有好多站崗既工作人員，唔識路可以問一問，唔使驚會迷路。
上去迎客松既路段又好長既樓梯要上，個個都要中途停幾次先行得晒。
好大霧，迎客松都差d睇唔到。
由於陰雨天，天都峰同蓮花峰都封山，無得上去。人人都好失望，不過安全至上！
黎到傳說中既武林聖地- 光明頂！問番先知，原來黃山既光明頂同武俠小說成日提既光明頂係無關係既。哈哈！但係呢度係黃山最有名氣最熱既熱點，點都要上黎！
由山腳行左6個鐘到4:30，終於黎到今晚既落腳點排雲樓賓館喇。因為旺季，好彩一早係網上訂好6人房既其中一個床位，如果唔係就要打地舖。一番到賓館就落好大雨，原本打算去排雲亭睇日落都無得睇了。
食完晚飯7點幾，個個都好早番房休息，因為第二朝要早起睇日出！希望會有好天氣啦！黃山夜晚會好凍，好多時4月份都只得0度，所以記得帶件厚褸。
賓館每日都會公佈第二朝日出既預計時間，想要到心水既地點睇日出就要做好功課計好時間起身。最多人去既係光明頂，不過賓館離光明頂較遠，我最後決定上丹霞山觀日出，只需要15分鐘路程。今日既日出大約5:50，我4:30起身，梳洗一下就拎住電筒出發！
今朝繼續落大雨，知道應該無日出睇到，但係難得黎到，照樣著雨褸上山睇睇啦。因為落雨，沿路都無乜人上山。「你一個人上山看日出？一塊兒吧！」係黑暗中遇到一個上海來既小伙子，就係咁一路上山一路分享大家呢兩日既經歷，仲交換左wechat將來有機會再結伴行山。
天愈來愈光，雖然睇唔到個咸蛋黃升上黎，不過都有好靚既雲海。
睇完日出，收拾好行李，7:00am再出發開始今日6個鐘既行程。去到排雲亭，個天突然間開朗左好多，個雲景又吸引左好多龍友係度影相。
經過排雲亭，走入西海大峽谷，簡直好似入左人間仙境，真係有騰雲駕霧既感覺。
我強烈推薦一定要行西海大峽谷，景色比黃山區內其他景點更加特別同驚奇。由一環到二環，再走落到谷底，成段路都係沿住個懸崖壁走，真係幻想唔到以前d人點樣起d樓梯。
由排雲亭行到去谷底要1.5-2小時，而且中途無小賣店，記住準備帶水。
谷底於2011年新建左地谷纜車，遊客可以利用纜車往返谷頂谷底，盛惠CNY80。不過個人覺得無咩特別，如果你有時間同體力就行番上谷頂啦，仲有多d山洞棧道睇。
上番谷，一路行去天海、北海、獅子峰、猴子觀海。好多人特登帶埋腳架上去猴子觀海影雲海，聽講話如果好天既話呢度睇雲係最靚既。
最後去埋相傳李白去過既夢筆生花、始信峰，係白鵝嶺坐索道下山，雲谷寺站搭番專營巴士出番湯口鎮。
差不多行左13個鐘，感覺好似係咁多年黎行得最辛苦既山，真係要趁後生有力有氣就好去。今次天氣麻麻，睇唔到日出日落，但有好迷幻既雲海，下次等晴天再黎探黃山。
【旅遊小錦囊】
– 如果時間許可，一定要在山上住一晚，一日遊太趕太辛苦，走馬看花。
– 比較出名既賓館有白雲賓館、北海賓館、排雲樓，質素唔錯，最重要睇你想係邊個景點睇日出日落。如果要光明頂睇日出，白雲賓館最近；丹霞峰、排雲亭近排雲樓；獅子峰既話則選北海賓館或獅林大酒店。
– 大多數人會選擇由後山上前山落，我反而建議前山上後山落, 採取先苦後甜既策略。因為始信峰、獅子峰等後山既景點比前山既光明頂、迎客松易行好多, 所以第一日體力充沛就先行前山會好d。
– 另外，建議前山唔好坐索道，因為沿路會經過天都峰同蓮花峰，坐索道會錯過左呢2個山峰。而後山既就可以坐落去雲谷寺, 無乜靚景會錯過又可以體驗下坐索道既感覺（所謂索道其實即係昂坪360個d 吊車，CNY80）。
– 裝備：黃山溫差大，朝早夜晚可以降至0度，日間就有1x度。行緊山時較熱，一件短袖加風褸就夠喇，帶多一件厚褸入夜同去睇日出個時著，賓館入面就好暖唔使擔心。切忌帶太多厚衫，無用之餘又會加重負擔。另外要帶手電筒，去睇日出個時黑漆漆既。山下面有好多人會sell 你買野，例如
1）地圖。CNY5, 唔實用，買黎只係收藏用，上網download仲好。
（http://www.hszyr.com/map.jpg）
2）行山杖，有平既木製亦有貴少少既膠/綱製。山下買平好多，CNY5, 上到山貴幾倍。上山時幾有用，個人覺得值得買，又可以留念。
3）雨褸。唔使係香港買定，去到先買，又平質地又好d，就算上山前無雨都要買定。仲有雨褲、鞋套，可以自己決定買唔買，幾蚊就可以成交。
4）勞工手套。唔使買，無乜地方要用手爬。
5）水。山上買水一支700ml CNY8，都幾貴，不過買一兩支水上去好喇，真係好重，水錢唔慳得。上山邊飲邊買啦！
6）乾糧，買定少量就夠。山上四圍都係小食店，有好多野食。記住買地道小黃瓜試試！
