作者：Wong Yik Fung Patrick
Day 2: 築地市場>淺草雷門+仲見世通>上野阿美橫町
第二日繼續食好野！10個去東京9個都會黎築地市場食最新鮮的壽司，要留意築地市場逢星期日同假期會休市，記得check清楚先去。築地分場內市場和場外市場，場內以新鮮的魚檔和壽司食店為主，場外就有好多其他水果漬物乾果店。
去築地搭地鐵好方便，大江戶線的「築地市場」站近場內市場，日比谷線的「築地」站就近場外市場，一般都係係築地市場站落車，先去場內市場再一路行過去場外市場，於築地站搭車走。
好多人話去築地要好早，其實目的係要感受大清早魚市場大拍賣，聽聞要早上5點到達，參觀魚販採購拍賣的過程，如果有小朋友就唔好諗了，事關始終係市場地方濕濕。
我覺得只要中午前黎到就得，因為場內市場的食店大多只開到中午，加上每一間都有長龍要排隊用餐。當然較出名的壽司店（如：壽司大、大和、鮨文）閒閒地都要排一個鐘，其他大約等15-30分鐘。今次食左間叫「丼匠」,同上次的「鮨文」比較，係平d不過魚生係無咁大件既。出名同唔出名真係有少少分別既，建議既然黎到有時間排耐少少食好d！不過呢間都已經好好味，好滿足！
由於間間都係好多人排同舖面好細，個個都食得好快食完就好識做自動起身走唔會霸住個位。
等既時候不仿買串玉子燒試試，由於食完都幾飽，2個人可以share一串小試牛刀。
唔嫌重，買少少水果番酒店食都好唔錯！我們買左士多啤利、蜜瓜、巨峰提子，味道一流。
場外市場有好多小食，自己去發掘一下吧。
去完築地，出發去淺草。淺草最有名氣的景點肯定是富有江戶文化的淺草寺，亦係東京都區內最古老的寺廟。淺草寺的入口懸掛著超巨大的雷門燈籠，一定要影番張相。
大燈籠後面有條長長的商店街，叫仲見世通，甚有新年行年宵的氣氛。簡直是一條手信街，好多野食、精品。淺草是在東京少有可以感受到古代氣氛的地方，值得去看看。唔知日本人係唔係好少講價文化，一路都無見到有人講價。
去到盡頭仲有個用人手泵水的水龍頭，好好玩！
跟住終於去shopping！買左一袋二袋，決定係上野地鐵站租個locker(¥400），放晒入去可以盡情血拼。想一路買但係又好輕鬆唔使拎住咁多野，記得善用Locker，多數地鐵站入面都有得自己入散紙租。
上野的「阿美橫町」步行街好好行，好似旺角咁多野睇。無論男男女女都可以搵到好多潮流衫褲，價錢絕對超值。而最多的是鞋店，除了知名的ABC mart，仲有好多其他小舖，Nike、Adidas、Asis等等的名牌運動衫波鞋通街都平賣。如果你比心機搵，¥2000¥3000一對波鞋，¥1000一件波衫都有交易，不過當然唔好大想頭想平價買到最新款的。我們都一人掃了一對鞋，真開心！
仲有女仕們最愛的藥莊，周圍都有，我就覺得間間都差不多，最緊要你入一間有退稅的。除了買野多，餐廳都好多，今晚隨意找了間普通的居酒屋，學下日本人放工放學去飲兩杯先番屋企，食串燒、飲sake。
今日的行程照顧左大人們，聽日要預備番d小朋友行程先得。