晉盈遊FANS PAGE (請LIKE!)

Day 3: 押上晴空塔+墨田水族館>上野+涉谷shopping>六歌仙燒肉

第三日,本身計劃去上野動物園同長頸鹿玩遊戲,可惜天雨關係,要臨時變陣。之前諗過的迪士尼、西武園、富士急樂園全部都去唔到,惟有改去晴空塔和隔離的墨田水族館。

晴空塔位於押上站,一出地鐵站就到啦。2012年之前,旅客多數去東京鐵塔遊覽,晴空塔建好後,旅客就轉而黎晴空塔,因為晴空塔高過東京鐵塔好多,當然風景好d啦。因為上次已經上過塔,望過東京的風景,今次只係係塔底影張相到此一遊算了。不過為了各位讀者,等我搵番2張上次上塔影的相給大家參考一下。

image38 image39 image39b

玩完自拍,轉去水族館,入場費大人¥2050,小孩¥600。墨田水族館乃全日本最大的室內水槽,共有2層,不過比我想像中細,個多小時就行完。

image40

館內有一個貫穿2層的大水缸,最驚訝的是還有一個大水池,旁邊有條樓梯由2樓伸落去1樓,可以由高空到近距離見一大班企鵝仔游水。原來企鵝遊水真係好快!

image41 image42

有好多變色水母,靚過海洋公園。

image43image44

最後影番張相留念,仲可以印落襟章,小朋友戴住好開心。

image45

臨離開押上,記緊去買Tokyo Banana番去,因為有晴空塔特別版的朱古力味豹紋蕉蕉,做手信一流,有4件裝¥500/ 8件裝¥1050/ 12件裝¥1550。因為太好食,雖然貴少少,都買左6盒番香港派,哈哈!

image46

由於女仕們反映琴日行上野未行夠,所以今日食完午飯特登預留時間再番上野Encore。值得一提,記得入去MUJI和UNIQLO,比香港平好多,HKD30有件MUJI Tee。

除左上野,東京當然仲有好多shopping熱點,視乎你鐘意邊一類型,我打d比喻大家參考一下。我就鐘意平價貨搵正野,要名牌的話留番去outlet先買。

  • 新宿:好多大型百貨公司,如IOIO, 似足銅鑼灣較高級的品牌。
  • 涉谷:小型boutique 為主,地鐵底下有商店街都有好多店舖,有灣仔、葵芳的影子。
  • 上野、原宿:旺角類,似旺角中心較低檔平靚正路線。
  • 秋葉原:毒男宅女朝聖地方,動漫野,打機,電器,不過小心d傻下傻下走左去d 18禁的動漫區域,深水埗來的。
  • 池袋:精品多,較為青春,潮流特區咁款。

到左我最期待的一餐,我早於出發前一個星期打長途電話過黎book, 網上好評如潮的燒肉店—六歌仙。想試的朋友一定要預先book, 因為我們7pm去到,發現如果無book位,要等到凌晨12am先有位,真誇張。我們去了位於新宿的六歌仙,地鐵站行10分鐘,好方便,不過記得上官方網站印張地圖,好清楚教你點行。

image47

有散叫,有套餐,有放題,有sabusabu,任君選擇。不過放題只可食差少少的肉,所以我們全部都係叫套餐跟散叫。叫左好多不同種類的肉,但係到最後都分唔到邊種打邊種,只分到好食d同無咁好食。

image48 image49

埋單每人¥12500,全家人都覺得物超所值。waiter哥哥仲送左一支果汁俾小朋友,好細心。下次會再黎!

image50

2 Replies to “Day 3 【親子遊東京】押上晴空塔+墨田水族館>上野+涉谷shopping>六歌仙燒肉”

Leave a Reply

This site uses Akismet to reduce spam. Learn how your comment data is processed.