Day 2.2 – 新社莊園【台灣的歐式花園古堡】

晉盈遊FANS PAGE (請LIKE!)
離開左薰衣草森林後,我地去新社食Lunch。行在新社,你會發現香菇邊度都有,因為依度最出名既就係香菇。我地當然要試下依度既名菜啦!司機結果帶我地黎到一間叫菇菇熊既餐廳。
午餐在菇菇熊。
我地決定散叫,哎左好多不同食法既香菇,好鮮甜健康!
我地9個人叫左9道菜,非常好食!埋單都只係50蚊港紙一個人。
晉盈遊開辦既第一團合照!期待會有更多團出現!
食飽後到隔離商店行下,有好多香菇買…
我對買香菇番香港無咩興趣,過對面街買d生果上車食。
上車去今日第二個景點【新社莊園】,約10分鐘就到了!去到新社莊園係1:40PM,入場費250台幣一人,會送100台幣飲食卷。
簡介:
新社莊園是一個位於台中大坑風景區的仿歐洲城堡建立的風景區,整個莊園擁有相當廣大的綠地山林相當於37個台北的大安森林公園,新社莊園是以台灣罕見的古歐洲城堡建築為號召,整個莊園的開發上保有原本的山林,順著山勢起伏,盡可能的以最自然原始的方式去開發。園區的每一條動線皆經過縝密的定位與規劃,依造不同的地貌採用不同的技巧,兼顧造景與水土保持,使得整個莊園在磅礡的氣勢中不失秀麗,也讓原有的山林有了嶄新的風貌。
果然,我地一入到去已經好似番左歐洲咁!
先黎到酒莊,不過今日無開門。
暸望台:
可以行旋轉形既樓梯上去影相。
行到依度,我地9人約好集合時間後就分頭活動了。
係莊園周圍行下,感受下台灣中的歐洲。
古堡是為保衛莊園而建的。(信不信由你)
我地由酒莊行去「羅馬遺址」
一間間屋其實係廁所黎架!係咪好靚呢!
黎到「羅馬遺址」,兩邊都有羅馬牆,中間一個噴水池,好多新人係度影婚紗相。
又真係幾靚架,雖然係假,不過幾可亂真。
沿住羅馬遺址行出城牆,可以望倒成個湖。
今日天氣真的一流了,如果我唔講依度係台灣,我可以寫一篇遊記用依d相話我去左歐洲呢!
我地行落湖邊行下,開始好熱,呀妹頂唔順同爸媽去左坐底hea,我同姑姐就繼續影影影。
湖畔半景。
向地圖既右邊行,就會去到一個好似土耳其綿花堡既地方。
有一條木做棧道,可以走入瀑布中!
玩下快門影下,好有趣既地方。
行完綿花堡,過左對面岸,就見倒呀妹佢地係度餵魚。
勁多魚一堆疊住一堆。
湖邊都有d薰衣草幾靚,唔通係薰衣草森林拎黎既?
行左兩個鐘都未完全行哂成個新社莊園,不過我地都覺得夠了,用佢d飲食卷一人叫左一杯野飲,好酸既烏梅汁。
下午三點半,我地離開新社莊園,前往日月潭民宿露天燒烤!
前往民宿途中,羅司機車我地去一個好出名食芋既地方,話好多新加坡人都一定要黎食,叫東東芋圓。
今日好彩唔係好多人,等一陣就有位。
我地一人叫左一兜,好大好足料,幾好味。
由新社去日月潭大概要1小時多車程,我地去到埔里市時要去便利店買野飲for今晚燒烤,順便參觀下台灣人叫既「百萬廁所」!
依個公廁係全台灣最高級既公廁!超乾淨同有冷氣,令我柯完都唔想出番黎,哈哈。
好接近我今次台中好期待既露天燒烤喇!下一篇唔可以錯過!
經驗分享:
  1. 新社莊園入場費250台幣一人,有100台幣現金卷回贈。
  2. 莊園地方大,預2小時比較好。

相關文章:

台中5天遊機票篇
Day 1 抵達台中【 米卡沙旅店】
Day 2.1 新社【薰衣草森林】
Day 2.2 新社莊園【歐式花園古堡】
Day 2.3 日月潭民宿 露天花園燒烤
Day 3.1 日月潭遊湖
Day 3.2 集集車埕篇
Day 3.3 清境夜遊小瑞士花園
Day 3.4 清境單棟小木屋
Day 4.1 清境青青草原
Day 4.2 18度巧克力工房
Day 4.3 台中必逛夜市【逢甲夜市】
Day 5.1 台中最終章【手信篇】

2 thoughts on “Day 2.2 – 新社莊園【台灣的歐式花園古堡】

    • 近呀,薰衣草森林(新社店)就是在新社的,但要留意有好多薰衣草森林,不要去錯。

Leave a Reply