Day 2.1 – 新社【薰衣草森林】拍拖好地方

晉盈遊FANS PAGE (請LIKE!)

黎到台中既第二日,我地9人由今日開始會包車三日,一共2台車九人大車!包車詳情同價錢在此文章最底的經驗分享。我地約左羅司機9時正在米卡沙旅店等,我地七點半就到了樓下餐廳食早餐,我地係最早到的,一個人都無!

環境舒服,早餐更正!
我地尋晚check in時已選定今朝食咩早餐!我揀左A餐!
早餐好快就黎到了!超豐富的說!一個豐富既早餐真係好重要!
Micasa Hotel既餐廳叫Mi Cafe。
台灣人真係好識得擺設裝飾!
食飽早餐後,我就番房上下網,執下行李,就落樓下大堂check out同等司機了。
米卡沙旅店外有個小草地。
旅店附近有個藝術區。
上網睇在左好多個司機,最後揀左羅司機,之前同佢講左好耐email,之後三日都跟住佢了!
我地一行9人8時40分準時離開出發!
車很舒服,大概10點就到達我地台灣之旅第一站 –  新社【薰衣草森林】
薰衣草森林 ,是創始於台灣中部地區以薰衣草香草植栽為名的花園農場休閒景點,總公司設於臺中市西屯區。2001年於台中新社山區成立第一家店,拓展了新竹尖石與苗栗明德等處,是台灣中區熱門休憩區,也連續幾年入圍台灣百大旅遊景點。
入場費200台幣,不過可以全部用黎買野,所以係等於免費的!
薰衣草森林10點半先開門,我地有少少時間在門口既商店行下。
一行入商店就有一陣薰衣草味,好香。
商店內有好多薰衣草製品,所有野都可以用入場費的200台幣買。
商店很適合女孩子,我就選擇係出面坐下hea下。
出面都有好多野可以影相,呀妹話佢台中最鍾意就係這個薰衣草森林wor,少女很喜歡這裡吧,好有童話feel。
一入到森林,就要先「淨身」!
所謂淨身,就係行入去禁制,薰衣草味既香水就會噴上你個身,令你成程都香噴噴!
薰衣草森林在山谷內,所以空氣非常好,與世隔絕咁。
沿途指示好清晰,無地圖都無所謂!
我地自己整書籤。
我地實在好hea,行左無耐就坐底。
先試一個薰衣草味雪糕!第一次食,好有薰衣草味!!
食完雪糕唔夠,再黎多杯薰衣草奶茶!我覺得我由外到內都已被薰衣草融化了….
之後我地就周圍行行走走。
如果你去南法的話,薰衣草只會在5,6月才有,但在薰衣草森林,你一年365日都會見倒薰衣草。
我地沿住薰衣草地行上小山丘,就會去到許願樹了。
係依度寫底願望(不外乎身體健康,升職加薪,中六合彩….)
再掛係依度誠心許願就得架喇。
許完願就周圍影下相,周圍都係山,好舒服。呀妹話依個景好靚,我地9個人都係度逐個逐個影,影左勁耐….
我地從小山丘行番落山,一路經過好多薰衣草。不過如果想見好多好多薰衣草的話,就要揀岩季節來了。
行左個幾鐘,我地去到最後一個景點,香草市集同香草House
香草House,係另一間商店。
香草House入面有個香草迷宮。
樓梯每間屋仔都有唔同既花香味,好特別,我每種味都有聞一下。
迷宮入面有好多唔同既野睇,我唔逐樣介紹了!入面有間房好靚,如果住係度都幾過癮!
行完香草House後,我地就出番去香草市集買下野。
我地都買左幾多野下,全部都係好香好香既野!
女士們就最開心了!男士們就…負責比錢吧!
下一站:新社莊園古堡,一個非常美麗的歐洲花園,記住留意呀!
經驗分享:
  1. 羅先生包車每日一台車5500台幣全包(2013年10月價),可以email聯絡:mm631003@kimo.com。他會很快回你的!他駕車安全,車也舒服,很大,亦不會說很多話,他建議的景點亦很好,我就在這裡推介下!
  2. 薰衣草森林比較偏僻,包車去吧!台中到此約1小時20分鐘。
  3. 入薰衣草森林入場費200台幣,可用在場內消費。
  4. 薰衣草雪糕,點都要試試!
  5. 這個地方很適合情侶,同埋環境好同少遊客。

2014年5月更新:

讀者Zoe於2014年5月預定了羅司機2天用車,感謝Zoe向我反映她是次的經驗,以下是她向我提供的不愉快經驗:

你好呀,我們一家剛從台中回來,想告訴你有關羅司機的事情。

我們是book 左羅司機兩天用車既,之前已問清楚是否佢本人來接我地,佢話係,但接車前一晚大約六時,佢打我香港手提話我知,佢攪錯日子不能親自來接我地,改為他的爸爸來接我們,當時我想他爸爸會不會年紀比較大,我地兩家人有大有細都擔心架,但沒辨法因第二天早上已經要用車,定唔切其他公司。

第二天他爸爸比想像中年青,但車就很殘舊,車位是生銹的,見到架車就令我心情一沉,之後我打電話比羅司機反影不滿,他只是說沒有其他車可換,我就話你會不會收我平d,他說價錢一樣,我説不合理,就好似五星酒店換三星酒店,沒理由收五星價錢比三星的房我們。

第一天全日是用殘車,第二我們用半日車先見到你所講的車,但佢並無向我地道歉,其實我們已經打算唔同佢拗數,因不想讓他爸爸老人家不高興,到最尾佢當無事發生收我們全數。

因為你寫的遊記實在太好了,相信經你嘅推介都應該介紹左唔小生意比佢,我知你既出發點好好,但我唔覺佢係一個老實人,佢前一晚先話我知攪錯日子,我人已在台北,跟本就無其他選擇。希望你考慮會否再推薦這位司機。

本人希望各位有用過羅司機的blog友們向晉盈遊分享自己的台中包車經驗,好讓將會去台灣而打算包車的人有更客觀的事實分享!

相關文章:

台中5天遊機票篇
Day 1 抵達台中【 米卡沙旅店】
Day 2.1 新社【薰衣草森林】
Day 2.2 新社莊園【歐式花園古堡】
Day 2.3 日月潭民宿 露天花園燒烤
Day 3.1 日月潭遊湖
Day 3.2 集集車埕篇
Day 3.3 清境夜遊小瑞士花園
Day 3.4 清境單棟小木屋
Day 4.1 清境青青草原
Day 4.2 18度巧克力工房
Day 4.3 台中必逛夜市【逢甲夜市】
Day 5.1 台中最終章【手信篇】

2 thoughts on “Day 2.1 – 新社【薰衣草森林】拍拖好地方

  1. 你間米卡沙酒店係agoda睇一晚二千港幣, 但係佢網頁睇又唔洗咁貴, 隔離間新驛好似平啲。 book車成千五蚊港幣一日, 我兩條友超唔抵喎, 唔知搭的士來回薰衣草森林會唔會平啲呢? 我都好鐘意薰衣草呀, 盤龍峽都有個薰衣草園, 我買左好大包的薰衣草, 諗住慢慢用, 點知屋企太潮濕, 唔夠半年成包生蟲………而由於景區太多人, 個自助晚餐係排20分鐘的隊先拎到一碗麵。

    • 米卡沙酒店一定唔洗二千港幣!不過我認為2個人唔好住米卡沙,住其他近火車站的都OK。我揀米卡沙係因為有5人房,我地多人會抵d!book車2個人係唔抵的….搭的士來回薰衣草森林我唔知幾錢,不過薰衣草森林離台中都幾遠,你搭的士去又要叫架的士等你,我估的士來回要約2000台幣,你可以去台中的士網問下。

      薰衣草好香,不過唔好買好大包的薰衣草,買d處理好的會好d…擺得耐d!由於薰衣草森林好少人,所以肯定好過盤龍峽。

Leave a Reply