坪洲環島遊 25/8/09

晉盈遊FANS PAGE (請LIKE!)
今日天文台話下午會落雨,諗住涼番少少就同小盈去離島行下啦,今次我地去左坪洲,一個好容易去既小島。
睇書話環島一周要大約2.5小時,我地開始行既時侯係3點鐘過D,無諗過要行到7點先行完……出左碼頭後,向右沿住海濱一路行,行到盡頭既時侯,發現係無路的,之後唯有行番轉頭,睇番地圖,先發覺原來海濱係無路上山的…
行番碼頭,好容易就搵倒路上手指山,手指山係坪洲最高既山,其實亦只不過得95米高,我地一路沿住山路上去~


上到一半,向後一望,發覺景色已經好靚,每個島嶼都看得清清楚楚!
我地一口氣係酷熱既太陽照射下走到山頂!出左勁多汗
唔洗半個鐘就衝到山頂了!因為實在太熱了……係個亭入面休息左好耐
坪洲第一高峰,手指山留影XD
嘩!成個坪洲擺左係眼前,辛苦少少都值得啦~
山頂上有兩舊咁既石頭,唔知係咪因為其中一舊似手指,所以就叫做手指山呢?
坪洲遠眺南丫島
本身係地圖上面見倒有第二條路落山的,但在山上點都搵唔倒,最後決定沿路落山。落到山番番碼頭,成身熱騰騰,最好緊係係冷氣入面飲番罐凍野啦!坪洲依方面既設計真係好,係惠康隔離有個體育館,體育館入面有個好舒服既梳化,又有好靚既洗手間同Water fountain,真係一流配套!
休息左一陣後,我地就往北面既郊遊徑進發了!因為已經到傍晚既關係,所以天氣已經無之前咁熱~
郊遊徑既入口係一個好神秘既位置墳墓!無帶地圖去既話,跟本唔會知道入口原來係依度…恐怖既係,周圍一個人都無,行左十幾分鐘,兩旁既都依然係墳墓,而且間中聽倒D狗吠聲同樹叢入面既郁動聲,我同小盈一句話都唔敢出,只想快D行過依個地方……
終於過左墳墓了,行多無幾耐,右手邊出現左一條分岔路,一個似是而非既郊遊徑指示好似指去右邊條路咁,係依個時候,有隻野狗突然由右邊路衝出,直奔去我地前面既個條路,因此我地唔敢行前面條路,轉行右邊既落斜路……
落到去,又見倒一個屈機既指示牌,竟然指番上去我地行落黎個條路,我唔係見鬼掛!而且,如果唔行番上去,又有左右兩邊路比你選擇,天呀,點解坪洲咁缺乏正常既指示牌架……我決定向左行,係依個時候,竟然比我見倒一個人踩緊單車落黎wo!等我確定左佢係人之後,就問佢路啦,佢亦都好好人,我即刻清楚左好多路,真係好多謝佢!
有驚無險下,終於都去到坪洲東北面既釣魚公了
有好多奇形怪狀既右頭
Disneyland,如果夜晚黎黎依度睇煙花既話,一定好浪漫 (Necessary Condition: 要夠勇氣摸黑行入黎….)
依舊叫Snoopy石,影得唔係好似,真睇會似好多!
snoopy貪玩去左disneyland踩場揾同樣系狗ge高飛同一零一斑點玩,好可惜,係玩space mountain個陣跌左落海,之後就來到呢個地方,等左好耐charlie brown都沒有來救,因為charlie都唔屬於disneyland的,日子耐左就變左舊望主石
(故事由小盈加插XD)
一路行番出去,真係好驚會有野狗突然殺出,唯有快步行,好彩,無幾耐就出番東灣了
長洲亦有個類似既東灣,唔同既地方係,一個係被開發既旅遊區,一個仲保存依鄉村風味~^^
東灣
Openrice見倒洲至少有20間餐廳,但係在星期一既晚上,搵黎搵去都只得兩間餐廳,最後選擇左依間海鮮酒家。
要左個海鮮什菜煲同瑤柱炒飯,唔錯唔錯!
最後搭七點九既普通船離開,結束有驚無險既一天=]

P.S. 個人認為坪洲既路標需要改善~

2 thoughts on “坪洲環島遊 25/8/09

  1. 想問下呢 坪洲有冇D酒店民宿或者旅館既野?要求唔高,正常乾淨有床有位沖涼就ok 會唔會有邊間經濟實惠D?

Leave a Reply

Your email address will not be published.

This site uses Akismet to reduce spam. Learn how your comment data is processed.