印度金三角+喀什米爾八天遊 23/5/2009-30/5/2009 Part Two

晉盈遊FANS PAGE (請LIKE!)
Day 5

今日終於都到左我地印度之旅既主打景點——泰姬陵!因為Agra真係好熱好熱既關係,我地5:30AM就morning call,七點就出發,咁樣可以涼少少同埋無咁多遊客。

泰姬陵背後既淒美故事,簡單黎講就係有個沙賈皇,因為愛妻生第1x個仔時死左,非常掛念,為左悼念佢,用左22年時間起左個陵墓比佢~ 政府為左保護全為大理石打做而成既泰姬陵,係一公里範圍內都唔比有交通公具,只准接駁車接駁,所以我地要轉去另一架車

依架就係我地既按駁車喇,搭幾分鐘就到

終於去到泰姬陵了!政府會比我地每人一樽水同一個鞋套,緊係啦,我地比左當地人十幾倍既入場費架~

終於真係入到去喇,我地係咁影相係咁影,只係隱弱聽倒個領隊話九點鐘集合,真係好靚呢!

其實我覺得唔係淨係得一入門企係凳上面個view靚,前面大理石個view都好靚呀

依度係一百萬零一夜偷鞋既地方,我話邊度有咁容易偷倒丫

上到泰姬陵去面唔可以著鞋,咁都好正常既,唔通要d白大理石變黑咩

行到入面,係沙賈皇妻子瑪哈長眠既地方,雖然見倒當地人係咁影相,但係佢話唔可以影相既,所以我都無影相

泰姬陵後的景色(印象中係slumdog millionaire入面jamal就係係對面河跳落火車入泰姬陵)

陵上既大理石雕刻

其實泰姬陵唔大,個幾鐘倒一定行哂,我地仲有時間影松鼠仔添

九點鐘離開,個衰導遊話要拎張飛去claim錢…唔比我地做紀念!!!唯有影左當有啦…

之後坐左十幾分鐘車去到Agra Fort(亞格拉堡),依度同泰姬陵完全唔同,係完全用紅色既石頭做成的,話說沙賈皇因為愛妻死左,荒廢朝政,成日掛住呀泰姬,佢個仔見佢唔做野,就將佢禁錮左係亞格拉堡既一間房入面,雖然係咁,但都比左間對住泰姬陵既房佢,等佢可以每日都望住泰姬陵。就算係佢老年視力衰退,亦會用紅寶石反射由泰姬陵傳黎既光。沙賈皇對瑪哈既愛念,真是令人動容。

亞格拉堡外圍

因為已經接近中午,開始好熱..個太陽幾大~

亞格拉堡入面既一個花園

由亞格拉堡回望泰姬陵,有種淒美既感覺…

城堡內

走既時候真係好熱…成四十度都有…

之後參觀大理石廠,買左個泰姬陵模型,係全用大理石造成的,我覺得幾靚,由30US講到21US~

番酒店午餐,又係咖哩,開始頂唔順佢d咖哩喇….淨係食白飯同薄餅…

之後搭一個鐘車去勝利宮,勝利宮係一個荒廢左既宮殿,在勝利宮,我第一次感受倒咩叫熱!相信係我人生有記憶以黎最熱既一個時刻!

同泰姬陵一樣,我地要坐接駁車去的,當時大概兩點鐘倒,我坐係窗口位,d熱風吹埋黎…閂窗又唔係,唔閂又唔係…

落到去要上e條長樓梯~

上到去既view

d小販係度賣d唔知變壞左幾耐既生果,d烏英係咁飛黎飛去,都唔知邊個傻佬會買…

樓上的蜂巢””

入到去真係熱得非常!因為唔比著鞋既關係,所以有條布路,為左唔好熱親隻腳…

三個傻人係度扮凍XD

睇左半個鐘倒就走左lu,因為真係太熱了…不能忍受

三點起程出發前往有粉紅城市之稱既Jaipur(齋浦爾),係巴士上同Marco傾左好多”有趣”既話題XD  七點鐘就到了,好快~ 又食咖哩,食完後好頭痛…食左粒止痛藥之後休息一陣就無事了~ 

我地今晚住係Hotel Mansingh,張床好舒服!

Day 6

今日成日都在Jaipur觀光,話說當年殖民政府為左迎接英國親皇到訪,將成個城市染成粉紅色,無論係街道,城門,樓宇,所有都係粉紅色,好特別!

因為新華包左個Yoga既,所以早上本身係5:00AM morning call,但係實在唔想起身,加上個領隊比我地選擇6:30AM起身唔去Yoga,所以決定放棄~~ (後來d團友話個導師一開始就做d高難度動作,d團友做唔倒,一個走一個,結果未完已經走哂^^我地做左明智既決定)

7:45AM出發,首先係參觀Amber Fort(琥珀堡),佢係依山而建既堡壘,由外圍望去已經好狀觀。

仲有見倒有人吹蛇,不過佢地一見倒人影佢就要收錢,但係我都偷影倒一張

之後就到達城堡底喇,黎到琥珀堡,旅客一定會試下騎大象既,我好似第一次騎大象….唔記得左lu,見倒好多象~

我地排左20mins就上左象喇,係排緊隊既時候,d麻煩小販成日將d帽帶落人地個頭度,再講20 rupees, 20 rupees…超麻煩

上到大象了,影張靚相先! 黃色頭巾係我地既「象夫」

沿途見倒d好識擺pose既細路

一路上,一路上

暴哂左20 mins,上到去了~

依個就係一上到去既廣場

大象加蓮花,代表印度教同回教既融合

同小朋友影相留念先!

皇帝既花園仔

之後黎到鏡之宮殿,由萬幾塊鏡組成,話說只要夜間用一支蠟燭,就可以營做漫天星星既感覺~

牆上既雕刻亦都唔可以睇少~佢係一朵花,魚身,牛尾巴,蠍子…..

之後去到妃子住既地方,一人一間房,我地可以任意係房同房穿梭,如果玩捉迷藏一完好好玩~ 我覺得e度係成個琥珀堡最精彩既地方

成玩團友熱到坐哂係度=]

第一次係印度買野飲,50 rupees,又冰凍,又解渴!

因為大象係有上無落既,所以安排左吉普車比我地落去,十分鐘就落到去了

後面似唔似萬里長城呢~其實係琥珀堡既城牆來的

參觀完後大概10:30AM,乘車經過水之宮殿,Jaipur有好多依D宮殿,廢置左之後變成酒店~ 我記得依間酒店係一周刊介紹過,要$2000一晚”””影張相當住左XD

之後去睇城市宮殿同古皇宮博物館,我個人認為無咩好睇,城市宮殿只不過係d有錢佬住既地方,又唔可以入去睇,古皇宮博物館係睇以前皇帝著既衫,同埋打仗用既武器,無咩特別

城市宮殿

之後就去左參觀古天文台,一直都幾期待,想睇下印度文明古國既測量技術,結果發現真係好勁,我一個都睇唔明…..

Virgo,我既星座^^

同一個漂亮妹妹影左相,睇下佢既衣著,都知佢都出身非草根啦

後來見個活潑DeeDee係度玩水

參觀完後,我地去左睇珠寶廠,仲有汽水送添。個領隊terence真係好搞笑,話說佢之前參觀大理石廠時已經講過話自己收得好少佣,參觀e d 地方都係為左交功課比公司,所以佢係地毯廠入面,一邊用英文講”Bargain, Bargain”,一邊用中文講”合作d合作d,扮下睇野就快d走~~” 我地果然好合作~ 好快搞掂!

1:15AM番到酒店食Lunch,之後比我地休息,免受中午烈日暴哂之苦,唔錯唔錯。三點半再出發,terence話又要做多場戲,參觀地毯廠~ 我地又好合作,一睇完踢腳走人,過程順暢,一take10mins搞掂!

及後去番城市宮殿坐人力車,由城市宮殿到風之宮殿,大概30mins倒。我覺得坐人力車依個活動真係幾好,可以讓我地更深入咁去接觸個城市,又可以影多d城市既靚相~

不過最緊要真係帶番個口罩,因為真係好大塵…

浩浩蕩蕩出發!

樓閣

Jaipur七個城牆之一

人車爭路…好危險

終於到了風之宮殿 (Hawa Mahal)了!

風之宮殿係由953道窗組成,在以前保守既時代,d女子就會透過窗戶去欣賞出面既花花世界,同時亦都唔會擔心自己容貌被看見

之後就開始買手信了!有個幾鐘時間買手信,我地去左附近既市集,鋪頭,不斷講價講價XD收獲豐富!

6:30PM集合,去睇一座印度神廟,叫濕婆神。

在廟外留影

美麗的晚霞

入緊廟既時候,有個印度肥仔走黎問我係邊度黎,我心諗,睇見你衣著光鮮,身在福中不知福e個死人樣,知唔知你地印度有幾多人幾貧窮幾慘。不過諗深一層,人地見倒我,咪一樣會咁諗。

7:30PM番到酒店,晚餐又係…我諗我都唔洗多講喇。之後去左睇甩甩漏漏既印度歌舞表演,我覺得我上去表演轉書或者拋橙會更多人欣賞

豐富既一天就咁完了,是次印度之旅在酒店訓的最後一晚。

Day 7

終於都到左最後一日了…好唔捨得。5:30AM起身,諗住6:45AM走人,點知有位團友嚴重胃抽筋,嚴重到請左個醫生去佢間房吊左一大包鹽水,結果到7:45AM先離開酒店,delay左一個鐘。

搭車番德里,好長既車程,塞塞地車,結果遲左一個鐘先到達,去到食飯既地方已經2:00PM了,比預定時間遲左兩小時。途中小盈發現自己部video-cam唔見左,搞到大家都好擔心好唔高興,心情底落,連領隊比我地既手信購買表都無心情睇。好彩係臨到既時侯,領隊突然話酒店搵倒一部camara,唔知邊個團留低,我即刻話係我地既,小盈終於都笑番^^

去食中餐,其實只可以話係印度式中餐。

第一次破戒食雪糕,不過都唔係咁好味”””

開始市內觀光,首先係國會,因為唔可以停留,所以只可以係車上面影相。

之後去左印度門,同巴黎凱旋門有相同風格

及後參觀左甘地之墓

最後參觀左蓮花寺,好有特色既建築

之後好搞笑,因為無時間既食dinner,但新華又包左wo,結果就以當地M記代替!好欣賞terence既認變能力~

去左街市買左d芒果,同去手信店買左d咖哩粉就去機場了…印度,I will be back~~

Day 8

9:00AM到達香港,印度之旅正式結束,terence講過話INDIA解做 ” I Never Do It Again “,但係我會再去的﹗

Leave a Reply

Your email address will not be published.

This site uses Akismet to reduce spam. Learn how your comment data is processed.