印度金三角+喀什米爾八天遊 23/5/2009-30/5/2009 Part One

晉盈遊FANS PAGE (請LIKE!)
第一次同小盈去旅行,諗左好耐去邊度玩最好,又要少shopping,又要有體驗既,又要唔貴,最後就去左充滿神秘既文化古國,印度﹗
(From Google Earth)

第一天

三點幾同小盈一齊搭A12到機場集合,第一次去二號大樓,同MichelleMarco匯合後就一齊搭7:15PM班機前往孟買了﹗
jetairway,每個位都有部電腦,係touchscreen黎既,最特別係D戲係可以forwardbackwardstop,正過國泰D機,不過唯一美中不足既係無英文字幕,搞到好多想睇既戲都睇唔倒成程機淨係睇左套葉問~
在機上食左第一餐咖哩餐,第一次食都幾好食既但之後就見倒都厭。
飲左支酒 (screwdriver),之後就開始胃痛,發冷,想嘔,好彩之後飲左多D水,diluteD酒,又有小盈照顧,可以平安落機~
約十一點(印度時間)到達孟買,架機停左係勁偏遠既位置,仲要接駁巴士勁慢,等左好耐先出倒飛機,跟住竟然在機場塞車,塞左廿分鐘先去倒侯機大堂…上到旅遊巴都已經十二點半,架車開到勁大冷氣,又無得塞住個出風位,搞到勁凍””
第一晚住在Palms Hotel,要過金屬探測器先入倒去””
之後就到今日既重點了﹗入到房間先發現無冷氣,而個陣已經接近2:00am了…叫左人黎整,佢本身話”five minutes! five minutes!” 點知整到2:30am都未整好,佢終於肯比我地換房,仲有意外驚喜添!佢比左一間超大房間我地,一房一廳^^ YEAH!
是晚只享受左房間四小時,便被morning call吵醒了…
第二天
朝早七點就比morning call叫醒,搭十一點二十分機去Sriangar,在機上可望見孟買貧民窟。
Sriangar係印度北區既一個城市,因政治問題,成個城都係軍人…兩點到達,無lunch食,見倒機場勁多軍事設施,到處都係軍人,有D驚佢走火….
有人幫手攞行李,一個關都無過就出左機場,之後搭吉普車去船屋,D行李就咁放係車上面…好彩無跌落黎
船屋係我地依兩日既酒店,每一架船都有四間客房,由一個船主打理三餐。去船屋既交通公具只有水上的士。
水上的士
船屋
我地既型仔駐喀什米爾導遊
我地間船屋名叫做New Zealand”””船屋入面既裝飾的確好靚~
食完飯搭番水上的士番上岸,坐廿分鐘車去Mughal Garden。依個花園係當年印度皇帝建造既一個花園,非常漂亮* 我地行左上差唔多最高又行番落黎
由Mughal Garden回望達爾湖
同司機的合照~覺得佢幾靚仔
六點離開,去左參觀地毯廠,其實D地毯真係幾靚,不過覺得佢勁屈錢,所以無買~行左一陣就走lu,番番船屋,八點半食dinner,跟住因為無得出去,要係船屋入面hae”
番去個程的士覺得凍,殊不知聽日先係凍既開始…
晚餐,都幾好食
臨訓前個鼻好唔舒服,沖涼又凍,水壓又低,食左粒感冒藥就立即訓了…
第三日—凍到傻左既一天
7:00am被morning call (jer係船主hau門) 嘈醒,搭吉普車去Gulmarg騎馬~ 咁大個人第一次騎馬,仲要係2700m高既高原上,都好期待﹗去既時候天氣好好,領隊話高原氣溫大概廿一二度,所以我帶左件風褸,加著兩件T-shirt。
搭左1.5小時吉普車倒,中途停左個油站,但係得一個toilet,我地成三十一個人,結果等左半個鐘倒先起行…見倒個幾有得意既小朋友,同佢影左張相~
途中見倒很多羊羊,諗起迷途迷途孤燕XD
架車越行越高,去到2700m既高原上,臨落車,等緊上馬既時候,開始風雲變色,打雷…深知不妙…
我地係最後一批上馬,前面d團友已經走哂…一上到馬,即刻落大雨…d雨仲要夾住d大冰塊,凍到傻左”””d冰穿過條褲入落隻腳度,成隻腳濕哂。
之後雨越黎越大,隻手越黎越凍,完全影唔倒相,伸都伸唔倒出黎,我覺得氣溫低過十度…
D人帶左我地成班人入左一間廢屋,咩都無,都叫做一個暫時休息既地方,個個團友都諗緊點保暖””個d貪得無厭既馬夫,帶我地參觀完個廢屋之後竟然仲有面向我地收10rupees參觀費!我地緊係全部人扮唔識聽啦~……騎左超過一個鐘,終於可以落馬了,入左一間酒店,總算暖少少
等左一陣,領隊terence終於黎救我地了…帶左我地去食lunch,依一杯好溫暖既喀什米爾茶真係好好味*
食飯個陣仲係好凍好凍…睇下我地個樣~
食完飯後行出出面見個一座大雪山,好靚^^
之後就離開高原區了,大概四點幾番到市區,我地停留左半個鐘係當地既市集,除左可以了解下當地人民既生活外,亦都可以買d生果番去解決我地constipation既問題~影左一d當地人生活既相
市集
生果店
小販在磅我們買的西瓜,個西瓜45rupees,好平
山區既天氣果然喜怒無常,在行市集時還沒有下雨,一上車又下起傍砣大雨來…只可以用落狗屎黎形容!我地搭緊水上的去番船屋既時侯,由頭濕到落腳趾尾,勁狼狽,終於六點幾帶住飢寒既身體番到船屋~
是晚不斷影相=]
New Zealand大合照,船主都係入面呀

船與船之間

船頂

與船主合照
第四日
今朝4:40AM就起身=.=


好凍好凍…天未過就要去遊船河,去遊水上市集同達爾湖外湖。五點就上船,吸取左尋日既經驗,今次早有準備,著左六件T-shirt加一件外套~但係上到船先唔記得帶相機,好彩有小盈部相機~


我諗當時得十幾度倒,著咁多衫都覺得好凍,不過都幾舒服,好有度假既感覺~~睇倒當地人既水上市集,d船迫住哂,場面壯觀。之後遊下遊下出左外湖,太陽都出來了,不過隻腳依然好凍”””遊左1:15mins,番番船屋食早餐。
食完早餐又去遊湖,今次係旅行社包既,遊內湖。好似入左d沼澤區咁,河水入面好多細魚仔,間中又有鴨仔浮下沉下咁,幾得意,仲見倒當地既學生番學tim!


又遊左一個鐘船,現在時間係9:00am,係時侯食午餐!搞笑~食完早餐就同美麗既喀什米爾講byebye了!有機會既話我會再係冬天來的^^
10:30AM出發去機場,話說我地入境既時候咩都無check過就入左喀什,出境同入境就係兩個世界…我地經過五重安檢:
1. 吉普車入到機場範圍,要拎行李出黎過X光,亦要搜身
2. 入機場要過X光同搜身
3. D行李寄哂倉後(背囊亦要寄倉),入候機室hand carries要過X光同搜身
4. 過完X光要搜hand carries,逐個items問係咩
5. 出到去跑道,要過金屬探測器
終於入倒飛機了!YEAH!


飛左兩個鐘到德里,一出機即刻feel倒39度既高溫…….好彩我地架旅行車又豪華又有冷氣又有風扇,正!坐5個鐘車由德里直落阿格拉(泰姬陵!!)
途中見倒德里街邊市民飲水既情況…..


去到酒店都八點幾,九點先dinner (又咖哩),訓覺! 間房都幾好~我地住係Hotel Mansingh Palace

Continue to Part two

Leave a Reply

This site uses Akismet to reduce spam. Learn how your comment data is processed.