《復活節黃山2天遊》(黃山遊記+旅遊建議)

晉盈遊FANS PAGE (請LIKE!)

《復活節黃山2天遊》

作者:Wong Yik Fung Patrick

細細個聽爸爸媽媽話以前成日坐火車番大陸旅行,樣樣都要平,一直都好想體驗一下佢地既青蔥歲月。今年復活清明連續幾日長假,一於揹起背包出發。而講到要又平又有靚風景,梗係去行山親親大自然。今次就揀個最出名既黃山!

黃山位於安徽省南部,最高的蓮花峰有海拔1840米。「五嶽歸來不看山,黃山歸來不看嶽。」由古至今都有不少詩人文人係黃山之巔吟詩作對,驚嘆大自然既鬼斧神工。

出發去黃山之前一定要搞清楚黃山市區入面既地方名。黃山市係包含好多小鎮地方,一般我地話去行黃山,係指黃山風景區,飛機同火車都唔可以直接到既。無論黃山既機場定火車站,都係屯溪區入面。而家愈來愈多航空公司有開香港直飛屯溪,或者可以去深圳坐內陸機,價錢平少少,來回HKD1600-2000;想慳錢體驗艱苦團坐火車,可以上網(ctrip, 芒果網⋯)或者去中旅社預訂火車飛。建議早d買飛,買臥鋪休息,CNY325一程,事關深圳去黃山要坐19小時。我就比較遲買火車飛,要坐硬座⋯坐到腰都直埋。

image1

搭咁耐,就算坐係度都要訓一訓。

image2

火車去到屯溪係朝早7:30,時間夠鬆動,先去街邊檔買d手抓餅同肉飽做早點。買既時候車站附近已經有好多工作人員問你係咪去行山叫你買車飛,又叫你幫襯買行山杖、雨褸、地圖等等。

image3

假日既話要等半個鐘至一個鐘先上到車。

image4

屯溪距離風景區都仲有一段路程,首先要搭車去湯口鎮的換乘中心,再係換乘中心搭風景區入面的專營巴士先到達風景區既山腳。你可以選擇去前山從慈光閣起步,或者從後山雲谷寺起始。至於由前山定後山起步好d呢,就取決於你會唔會係山上入住,同埋入住邊間賓館喇。

我今次就選擇左從前山上後山下。係山腳望上去已經好興奮,d雲好靚!

image26

image28

其實黃山既路比想像中安全,全部都係已開發既石路同石級,不過當然有好多好高既石級令你爬到氣喘。

image27

浴路都有好多指示牌,又有好多站崗既工作人員,唔識路可以問一問,唔使驚會迷路。

image6

上去迎客松既路段又好長既樓梯要上,個個都要中途停幾次先行得晒。

image8

好大霧,迎客松都差d睇唔到。

image9

由於陰雨天,天都峰同蓮花峰都封山,無得上去。人人都好失望,不過安全至上!

黎到傳說中既武林聖地- 光明頂!問番先知,原來黃山既光明頂同武俠小說成日提既光明頂係無關係既。哈哈!但係呢度係黃山最有名氣最熱既熱點,點都要上黎!

image10

由山腳行左6個鐘到4:30,終於黎到今晚既落腳點排雲樓賓館喇。因為旺季,好彩一早係網上訂好6人房既其中一個床位,如果唔係就要打地舖。一番到賓館就落好大雨,原本打算去排雲亭睇日落都無得睇了。

食完晚飯7點幾,個個都好早番房休息,因為第二朝要早起睇日出!希望會有好天氣啦!黃山夜晚會好凍,好多時4月份都只得0度,所以記得帶件厚褸。

image11

賓館每日都會公佈第二朝日出既預計時間,想要到心水既地點睇日出就要做好功課計好時間起身。最多人去既係光明頂,不過賓館離光明頂較遠,我最後決定上丹霞山觀日出,只需要15分鐘路程。今日既日出大約5:50,我4:30起身,梳洗一下就拎住電筒出發!

今朝繼續落大雨,知道應該無日出睇到,但係難得黎到,照樣著雨褸上山睇睇啦。因為落雨,沿路都無乜人上山。「你一個人上山看日出?一塊兒吧!」係黑暗中遇到一個上海來既小伙子,就係咁一路上山一路分享大家呢兩日既經歷,仲交換左wechat將來有機會再結伴行山。

image12

天愈來愈光,雖然睇唔到個咸蛋黃升上黎,不過都有好靚既雲海。

image13

睇完日出,收拾好行李,7:00am再出發開始今日6個鐘既行程。去到排雲亭,個天突然間開朗左好多,個雲景又吸引左好多龍友係度影相。

image14

image15

image16

經過排雲亭,走入西海大峽谷,簡直好似入左人間仙境,真係有騰雲駕霧既感覺。

image17

我強烈推薦一定要行西海大峽谷,景色比黃山區內其他景點更加特別同驚奇。由一環到二環,再走落到谷底,成段路都係沿住個懸崖壁走,真係幻想唔到以前d人點樣起d樓梯。

image18

image19

image25

由排雲亭行到去谷底要1.5-2小時,而且中途無小賣店,記住準備帶水。

image24

谷底於2011年新建左地谷纜車,遊客可以利用纜車往返谷頂谷底,盛惠CNY80。不過個人覺得無咩特別,如果你有時間同體力就行番上谷頂啦,仲有多d山洞棧道睇。

上番谷,一路行去天海、北海、獅子峰、猴子觀海。好多人特登帶埋腳架上去猴子觀海影雲海,聽講話如果好天既話呢度睇雲係最靚既。

image20

最後去埋相傳李白去過既夢筆生花、始信峰,係白鵝嶺坐索道下山,雲谷寺站搭番專營巴士出番湯口鎮。

image22

image23

差不多行左13個鐘,感覺好似係咁多年黎行得最辛苦既山,真係要趁後生有力有氣就好去。今次天氣麻麻,睇唔到日出日落,但有好迷幻既雲海,下次等晴天再黎探黃山。

 

【旅遊小錦囊】

– 如果時間許可,一定要在山上住一晚,一日遊太趕太辛苦,走馬看花。

– 比較出名既賓館有白雲賓館、北海賓館、排雲樓,質素唔錯,最重要睇你想係邊個景點睇日出日落。如果要光明頂睇日出,白雲賓館最近;丹霞峰、排雲亭近排雲樓;獅子峰既話則選北海賓館或獅林大酒店。

– 大多數人會選擇由後山上前山落,我反而建議前山上後山落, 採取先苦後甜既策略。因為始信峰、獅子峰等後山既景點比前山既光明頂、迎客松易行好多, 所以第一日體力充沛就先行前山會好d。

– 另外,建議前山唔好坐索道,因為沿路會經過天都峰同蓮花峰,坐索道會錯過左呢2個山峰。而後山既就可以坐落去雲谷寺, 無乜靚景會錯過又可以體驗下坐索道既感覺(所謂索道其實即係昂坪360個d 吊車,CNY80)。

– 裝備:黃山溫差大,朝早夜晚可以降至0度,日間就有1x度。行緊山時較熱,一件短袖加風褸就夠喇,帶多一件厚褸入夜同去睇日出個時著,賓館入面就好暖唔使擔心。切忌帶太多厚衫,無用之餘又會加重負擔。另外要帶手電筒,去睇日出個時黑漆漆既。山下面有好多人會sell 你買野,例如

1)地圖。CNY5, 唔實用,買黎只係收藏用,上網download仲好。

image29

http://www.hszyr.com/map.jpg

2)行山杖,有平既木製亦有貴少少既膠/綱製。山下買平好多,CNY5, 上到山貴幾倍。上山時幾有用,個人覺得值得買,又可以留念。

3)雨褸。唔使係香港買定,去到先買,又平質地又好d,就算上山前無雨都要買定。仲有雨褲、鞋套,可以自己決定買唔買,幾蚊就可以成交。

4)勞工手套。唔使買,無乜地方要用手爬。

5)水。山上買水一支700ml CNY8,都幾貴,不過買一兩支水上去好喇,真係好重,水錢唔慳得。上山邊飲邊買啦!

6)乾糧,買定少量就夠。山上四圍都係小食店,有好多野食。記住買地道小黃瓜試試!

 

One thought on “《復活節黃山2天遊》(黃山遊記+旅遊建議)

Leave a Reply

This site uses Akismet to reduce spam. Learn how your comment data is processed.